3 чэрвеня, Мінск /Кар. БЕЛТА/. Выстава "Пётр Шумаў. Вяртанне дадому" адкрыецца ў Музеі гісторыі тэатральнай і музычнай культуры 4 чэрвеня, паведамілі БЕЛТА ва ўстанове.
"Лёс многіх таленавітых беларусаў звязаны з вымушанай эміграцыяй. Так склалася і жыццё ўраджэнца Гродна Пятра Шумава - аднаго з самых знакамітых фатографаў Еўропы першай трэці ХХ стагоддзя, асабістага фатографа Агюста Радэна", - расказалі ў музеі.
На выставе прадставяць копіі 33 фатаграфій, выкананых Пятром Шумавым, з парыжскага фонду Parisienne de Photographie - Roger-Viollet. "У 1920-я гады Шумаў фатаграфаваў выдатных мастакоў, кампазітараў, пісьменнікаў, палітыкаў. Партрэты Марка Шагала, Льва Бакста, Уладзіміра Маякоўскага, Марыны Цвятаевай, Альберта Эйнштэйна, Клода Манэ і іншых змогуць убачыць мінчане і госці сталіцы. Гэтыя фатаграфіі даюць поўнае ўяўленне аб таленце партрэтыста Пятра Шумава і яго ўкладзе ў сусветную культуру", - адзначылі арганізатары.
Акрамя таго, наведвальнікаў экспазіцыі пазнаёмяць з матэрыяламі аб культурнай дзейнасці беларускіх музычных і тэатральных калектываў у Парыжы, перададзеных у дар музею экс-паслом Беларусі ў Францыі Паўлам Латушкам.
Выстава "Пётр Шумаў. Вяртанне дадому" будзе працаваць па 30 чэрвеня.-0-
