18 кастрычніка, Мінск /Кар. БЕЛТА/. Фестываль традыцыйнай японскай гульні пройдзе ў Нацыянальным мастацкім музеі 20 кастрычніка, паведамілі БЕЛТА арганізатары.
На фестывалі ўсе жадаючыя змогуць акунуцца ў дзіўны свет аўтэнтычных забаў Японіі, папоўніць свой лексічны запас, вывучыўшы некалькі слоў моўнага этыкету на японскай мове, развучыць песню і невялікі традыцыйны танец. Акрамя таго, кожны з удзельнікаў праекта атрымае магчымасць зрабіць папяровага жураўліка сваімі рукамі, далучыцца да калектыўнага малявання ў арт-майстэрні "Чарада жураўлёў" і наведаць тэматычную фотазону ў японскім стылі.
Фестываль традыцыйнай японскай гульні - адно з мерапрыемстваў культурнага праекта "Японская восень у Беларусі". Ён праходзіць з верасня па лістапад і ўключае шматлікія лекцыі, майстар-класы, канцэрты, кінапаказы, выставы і спартыўныя спаборніцтвы, прысвечаныя розным аспектам традыцыйнай і сучаснай японскай культуры.
Арганізатарамі мерапрыемства выступаюць цэнтр японскай культуры "Хагакурэ", пасольства Японіі ў Беларусі, Нацыянальны мастацкі музей.-0-
