14 снежня, Мінск /Кар. БЕЛТА/. Трыумфатар "Еўрабачання-2015" Монс Зелмерлёў стане вядучым самага маштабнага песеннага шоу Еўропы, якое пройдзе ў сталіцы Швецыі ў маі 2016 года. Аб гэтым паведамляе афіцыйны сайт "Еўрабачання".
Партнёрам Монса на сцэне ў Стакгольме стане вядомая тэлевядучая, любіміца фанатаў "Еўрабачання" Петра Медэ. Яна вяла конкурс "Еўрабачанне" ў 2013 годзе, а таксама юбілейнае шоу "Еўрабачання" ў гэтым годзе з Лондана разам з Грэмам Нортанам.
Арганізатары конкурсу лічаць, што пазнавальнасць вядучых-суперзорак дасць магчымасць па-новаму пабудаваць шоу і паказаць на сцэне "Еўрабачання" штосьці, чаго ніколі не адбывалася раней.
Еўрапейскія таблоіды называлі Монса галоўным кандыдатам на ролю вядучага. Арганізатар конкурсу з боку краіны-гаспадыні шведскі тэлеканал SVT праводзіў апытанне гледачоў аб іх чаканнях наконт асобы вядучага. Монс Зелмерлёў прынцыпова апярэдзіў іншых патэнцыяльных кандыдатаў.
У міжнародным конкурсе песні "Еўрабачанне-2016" у Швецыі прыме ўдзел рэкордная колькасць краін - 43. Паўфіналы міжнароднага конкурсу песні "Еўрабачанне-2016" адбудуцца 10 і 12 мая, фінал - 14 мая.-0-