8 лютага, Мінск /Кар. БЕЛТА/. Часовая экспазіцыя да 100-годдзя з дня нараджэння Героя Савецкага Саюза, Героя Сацыялістычнай Працы, выдатнага дзяржаўнага дзеяча Беларусі Пятра Машэрава адкрыецца ў Беларускім дзяржаўным музеі гісторыі Вялікай Айчыннай вайны 13 лютага, паведамілі БЕЛТА ў музеі.
Наведвальнікі экспазіцыі прасочаць этапы станаўлення чалавека-легенды: ад студэнта, сельскага настаўніка, партызанскага камандзіра да кіраўніка рэспублікі. Аб драматычным жыццёвым і баявым шляху Пятра Машэрава раскажуць шматлікія дакументы, фатаграфіі, асабістыя рэчы.
Упершыню шырокай публіцы прадставяць партрэт Пятра Машэрава пэндзля славутага беларускага мастака Міхаіла Савіцкага. Падоранае да 60-гадовага юбілею кіраўніка БССР палатно ўсе гэтыя гады беражліва захоўвалася ў сям'і Пятра Міронавіча. Упершыню выстаўлена пано з фондаў музея - вышыты партрэт Пятра Машэрава з датай 60 гадоў, падарунак ад працоўных Сенненскага раёна.
Рэдкая серыя фатаграфій захавала віншаванні юбіляра вядомымі людзьмі Беларусі: Петрусём Броўкам, Максімам Танкам, Іванам Шамякіным, Мікалаем Яроменкам. Побач - шматлікія падарункі, атрыманыя Пятром Мірановічам у сваё свята: кашуля-вышыванка ад работнікаў Аршанскага льнокамбіната, дэкаратыўны пояс ад працоўных Літоўскай ССР і іншыя.
На адкрыцці экспазіцыі будзе прадстаўлена кніга "Пётр Машэраў. Эпоха і лёс", прысвечаная 100-годдзю з дня яго нараджэння. На адкрыццё запрошаны сям'я Машэравых, калегі Пятра Машэрава, вядомыя дзеячы культуры.
Экспазіцыя прадоўжыцца да 13 жніўня.-0-
