11 снежня, Мінск /Кар. БЕЛТА/. Польшча прыме ў 2019 годзе дзіцячае "Еўрабачанне", конкурс стане сямнаццатым па ліку, паведамілі БЕЛТА арганізатары.
Заяўка гэтай краіны на правядзенне дзіцячага конкурсу была прызнана лепшай. Дзіцячае "Еўрабачанне" пройдзе ў Польшчы ўпершыню.
Як адзначыў выканаўчы дырэктар конкурсу "Еўрабачанне" Ён Ола Санд, заўсёды цікава ўпершыню прадстаўляць мерапрыемства ў новай прымаючай краіне. "І мы з нецярпеннем чакаем, калі ў наступным годзе ўвасобіцца ў жыццё канцэпцыя TVP (Польскае тэлебачанне. - Заўвага БЕЛТА) аб правядзенні дзіцячага конкурсу песні "Еўрабачанне-2019", - сказаў ён.
Раксана Венгель, 13-гадовая вакалістка з Польшчы, на дзіцячым "Еўрабачанні-2018" набрала 215 балаў і стала пераможцай конкурсу. Яна выступіла з песняй "Anyone I Want to Be".
Мінск двойчы прымаў гэты прэстыжны конкурс - у 2010 і 2018 гадах. У бягучым годзе ён прайшоў з рэкордным лікам краін-удзельніц. За галоўны трафей - хрустальны мікрафон - змагаліся прадстаўнікі 20 краін.-0-
