Сцяг Аўторак, 19 сакавіка 2024
Усе навіны
Усе навіны
Культура
21 лютага 2018, 11:04

Брэсцкі тэатр лялек падрыхтаваў прэм'еру эксперыментальнага спектакля "Мой тата - птах"

21 лютага, Брэст /Святлана Вячорка - БЕЛТА/. У Брэсцкім тэатры лялек 20 лютага адбыўся генеральны прагляд і здача мастацкаму савету эксперыментальнага спектакля "Мой тата - птах", перадае карэспандэнт БЕЛТА.

Новая пастаноўка брэсцкіх лялечнікаў створана паводле аднайменнай аповесці сучаснага брытанскага пісьменніка Дэвіда Алманда і прысвячаецца ўсім тым, хто верыць у сваю мару і хоча навучыцца лятаць. Гэта кранальная гісторыя пра ўзаемаадносіны дзяўчынкі Лізі і яе шалапутнага, на першы погляд, бацькі, які ўявіў сабе, што ён "чалавекаптушка", і рыхтуецца да ўдзелу ў Сусветным конкурсе летуноў. Акрамя самаробных крылаў у яго ёсць вера. Паступова сваёй ідэяй тата Кар-Кар захапляе не толькі маленькую дачку, але і сур'ёзную цётачку Дарын, і нават дырэктара мясцовай школы.

Гэта першае сцэнічнае ўвасабленне сур'ёзнай дзіцячай казкі з філасофскім падтэкстам. Аўтарамі пастаноўкі з'яўляюцца лаўрэаты Нацыянальнай тэатральнай прэміі і тэатральнай прэміі Расіі "Залатая маска" галоўны рэжысёр Брэсцкага тэатра лялек Аляксандр Янушкевіч і галоўны мастак Беларускага дзяржаўнага тэатра лялек Таццяна Нерсісян. Творчы тандэм знайшоў незвычайнае тэхнічнае рашэнне для сваёй задумы: у спектаклі выкарыстаны нестандартныя дэкарацыі, пластычныя лялькі, анімацыя.

"Для мяне асабіста гэты матэрыял быў незвычайны і абсалютна новы. Сюжэт не казачны - ён узяты з нашага жыцця, гэтым і зацікавіў. Рашэнне рэжысёра нетрадыцыйнае і вельмі сучаснае - гэта такі, як кажуць, еўрапейскі падыход. Эксперыментальны заключаецца ў чытанні і падачы матэрыялу. Па ходу пастаноўкі выкарыстоўваецца відэарад. Я спачатку сумняваўся, таму што бывае нялёгка пераключыць увагу з вялікага экрана на маленькіх лялек. Рэжысёр знайшоў залатую сярэдзіну, якая не перашкаджае, а ўзмацняе дзейства, што адбываецца на сцэне", - падзяліўся меркаваннем мастацкі кіраўнік Брэсцкага тэатра лялек Міхаіл Шавель.

Прэм'ерны паказ спектакля "Мой тата - птах" адбудзецца 25 лютага. Спецыяльна на прэм'еру ў Брэст з Масквы прыедзе перакладчык кнігі Дэвіда Алманда на рускую мову Вольга Варшавер. Спектакль ідзе на рускай мове 60 хвілін і рэкамендаваны для сямейнага прагляду.-0-

Фота Вадзіма Якубёнка

Падпісвайцеся на нас у
Twitter
Топ-навіны
Свежыя навіны Беларусі