24 ліпеня, Мінск /Кар. БЕЛТА/. Больш за 300 артыстаў з усяго свету падалі заяўкі на ўдзел у ІІ Мінскім міжнародным фестывалі цыркавога мастацтва, паведаміў карэспандэнту БЕЛТА дырэктар Белдзяржцырка Уладзімір Шабан.
"Аргкамітэт фестывалю працаваў вельмі напружана з пачатку года і па 1 ліпеня, калі завяршыўся прыём заявак. Іх паступіла больш за 300 з усяго свету, - сказаў дырэктар. - Удзельнікамі фестывалю стануць каля ста майстроў цырка з Бразіліі, Чылі, Кітая, Аўстраліі, Эфіопіі, Ізраіля, КНДР, Румыніі, Малдовы, Украіны, Казахстана, Расіі і, вядома, Беларусі, якія ў дзвюх праграмах пакажуць 26 разнажанравых нумароў".
Паводле слоў Уладзіміра Шабана, некаторыя краіны будуць прадстаўлены 2-3 нумарамі. "Так, з Расіі выступяць артысты Расдзяржцырка, Вялікага Маскоўскага дзяржаўнага цырка і Маскоўскага цырка Нікуліна на Цвятным бульвары, у якіх вельмі высокі выканальніцкі ўзровень. Расіяне прадставяць "Сустрэчныя арэлі", на якіх будуць працаваць дзяўчаты ў прыгожых бальных сукенках - гэта відовішча, якое зачароўвае. Выступіць Сяргей Несцераў з дрэсіраванымі белымі тыграмі, які пакажа філігранную работу дрэсіроўшчыка з жывёламі, без бізуноў і штыкоў, - растлумачыў дырэктар Белдзяржцырка. - Ізраіль таксама прывязе два нумары, адзін з якіх выканае 18-гадовая паветраная гімнастка Аліса Шэхтэр з ашдодскага цырка, а другім будзе проста фантастычны нумар з трансфармацыяй убораў за адну секунду Даніэля Беньяміна. У цэлым прапанавана вельмі шмат сольных нумароў, але мы пастараліся сабраць як мага больш групавых, адзін з якіх прывязуць артысты КНДР - эфектны нумар "Канат", які паказвае неверагодныя магчымасці чалавечага цела".
На фестывалі будзе сабрана разнастайная жанравая палітра цыркавога мастацтва: акрабатыка, гімнастыка, жангліраванне, клаўнада, эквілібрыстыка, фокусы, дрэсура і атлетыка. Беларусы таксама рыхтуюць некалькі нумароў. Паветраную гімнастыку прадставіць дуэт Настассі Дончанка і Настассі Пуцята, атракцыён Барыса Лазарова - дрэсіраваных вярблюдаў і лам, асілкі браты Дзмітрый і Багдан Казаковы, магчыма, падрыхтуюць новы ўнікальны трук.
Акрамя таго, на форуме выступіць клоўнскі дуэт Бэлы і Алекса Чарвоткіных і клоўн з Бразіліі Пепэ Жардзім. "Гэтыя два склады клоўнаў будуць працаваць у праграмах "А" і "В", а на гала-канцэрце выступяць разам. Да нас таксама прыедуць бацька і сын Франке - найвышэйшага ўзроўню клоўны, якія сваім майстэрствам вучаць людзей дабру і адносінам старэйшага і малодшага пакалення", - расказаў дырэктар Белдзяржцырка.
"Мы спадзяёмся, што другі фестываль атрымаецца яшчэ лепшым за першы, - адзначыў Уладзімір Шабан. - Мы хочам прыгожа прадставіць нашу сінявокую Беларусь у пралогу, які завершыцца парадам-але ўдзельнікаў фестывалю са сцягамі сваіх краін. Над сцэнарыем працуюць мастацкі кіраўнік Белдзяржцырка Вітаўтас Грыгалюнас і галоўны рэжысёр Ала Нікалаева-Аліева".
Удзельнікі цыркавога форуму будуць змагацца за такія ўзнагароды, як Гран-пры, "Золата", "Серабро", "Бронза", "Прыз глядацкіх сімпатый", "Прыз дзіцячага журы" і іншыя спецыяльныя прызы членаў журы. У судзейскую калегію ўвойдуць 10 чалавек: Урс Пілс (Манака), Ерык Жалжаксынаў (Казахстан), Жэніс Матабош (Іспанія), Пітэр Фекетэ (Італія), Людміла Шаўчэнка (Украіна), Максім Нікулін і Гія Эрадзэ (Расія), Пётр Дубінскі (ЗША) і Уладзімір Шабан. Ацэньваць артыстаў будуць па майстэрстве (трукавай частцы) і харэаграфіі (касцюмах, падачы, музычным афармленні) па 10-бальнай сістэме. Пры аднолькавай колькасці балаў будзе ўведзена дадатковае прызавое месца.
Узнагароды ўручаць пасля гала-канцэрта. Асноўны прыз - цыліндр з парчы і саломкі - вырабляе ДВГА "Белмастацпромыслы". Мінгарвыканкам забяспечыў 70 працэнтаў фінансавання, 15 працэнтаў - з уласных сродкаў цырка і яшчэ столькі ж склалі спонсарскія ўкладанні.
"Наш фестываль усяго толькі другі, але ўжо мае аўтарытэт у цыркавым свеце, а гэта значыць, што мы не дарма распачалі фестывальную гісторыю, - падкрэсліў Уладзімір Шабан. - Мінчане і шматлікія госці сталіцы атрымаюць унікальную магчымасць пазнаёміцца з лепшымі дасягненнямі сусветнага цыркавога мастацтва". Па выніках фестывалю будуць адабраны 15 лепшых нумароў для новай праграмы "Брава", якая будзе праходзіць у Белдзяржцырку з 27 верасня па 8 снежня.
ІІ Мінскі міжнародны фестываль цыркавога мастацтва пройдзе ў Беларускім дзяржаўным цырку з 19 па 22 верасня.-0-
