24 жніўня, Мінск /Вікторыя Апанасёнак - БЕЛТА/. Дзіцячы арт-фестываль "Калякі-малякі" адбудзецца 27 жніўня ў Нацыянальным гістарычным музеі Беларусі, паведамілі БЕЛТА арганізатары.
На фестывалі можна будзе ўбачыць выставы работ вучняў студыі малявання "Калякі-малякі", наведаць рысавальныя майстар-класы, якія дапамогуць асвоіць нетрадыцыйныя тэхнікі ў жывапісе. Майстэрня "Экалабараторыя" пакажа, як упрыгожыць сябе і інтэр'ер прыроднымі матэрыяламі. Таксама гасцям будзе прапанавана магчымасць вывучыць зорнае неба разам са спецыялістам у галіне астрафізікі Юрыем Васілеўскім і зрабіць на памяць бірулькі з сузор'ямі.
Разам з рукадзельніцамі майстэрні AmyFamily можна будзе падрыхтаваць для сябе або блізкіх "цёплы" сувенір. Танцавальныя майстар-класы ад школы танцаў "Квартал" не дадуць гасцям засумаваць і сагрэюць у дрэннае надвор'е, як і выступленне школы вакалу "Мікс". Рухомымі забавамі, гульнятанцамі і ўсмешкамі парадуюць аніматары студыі "Трам".
Адметнасцю праграмы абяцаюць стаць выступленне бэбі-тэатра "Пацеркі" і магчымасць паглыблення ў віртуальную рэальнасць разам з tilt brush - прыстасаваннем для трохмернага малявання, якое адкрывае новыя магчымасці ў творчасці.
Паводле слоў арганізатараў, кожны, хто 27 жніўня зазірне ў дворык музея, зможа атрымаць сваю порцыю радасці, весялосці, бадзёрасці, энергіі і добрага настрою на ўвесь будучы навучальны год.-0-
