20 лістапада, Мінск /Кар. БЕЛТА/. Адкрытае праслухоўванне прэтэндэнтаў на "Еўрабачанне-2016" пройдзе 26 лістапада ў Белтэлерадыёкампаніі. Аб гэтым БЕЛТА паведамілі ў прэс-службе Белтэлерадыёкампаніі.
Анлайн-трансляцыя праслухоўвання ўдзельнікаў нацыянальнага адборачнага тура міжнароднага конкурсу песні "Еўрабачанне-2016" будзе арганізавана на афіцыйным сайце Белтэлерадыёкампаніі.
Праслухоўванне пройдзе ў рэжыме жывога гуку ў суправаджэнні музыкі і (або) фанаграмы, запісанай без вакалаў любога віду або якіх-небудзь вакальных імітацый. Пачатак праслухоўвання - 12.00.
Сярод прэтэндэнтаў - як сольныя выканаўцы, так і калектывы. Таксама журы праслухае кампазіцыі, прысланыя не выканаўцамі, а аўтарамі песень.
Пераможцу нацыянальнага адбору вызначаць гледачы з дапамогай тэлефоннага і смс-галасавання ў час трансляцыі фінальнага шоу.
Пераможца праекта стане афіцыйным прадстаўніком Беларусі на міжнародным конкурсе песні "Еўрабачанне-2016" у Швецыі.
Арганізацыю нацыянальнага адборачнага тура і падрыхтоўку беларускага ўдзельніка да міжнароднага конкурсу песні "Еўрабачанне-2016" ажыццяўляе Белтэлерадыёкампанія як адзіны ў Беларусі член Еўрапейскага вяшчальнага саюза.
Паўфіналы міжнароднага конкурсу песні "Еўрабачанне-2016" адбудуцца 10 і 12 мая, фінал - 14 мая. Сталіца Швецыі Стакгольм стане гаспадыняй гэтага конкурсу ў наступным годзе.-0-
